खोडकरपणा व खेळकरपणाचा नमुना असलेली ही वसंत बापटांची एक सुरेख कविता

खोडकरपणा व खेळकरपणाचा नमुना असलेली ही वसंत बापटांची एक सुरेख कविता
जीना हा वरच्या मजल्यावर जाण्यासाठी नसून
प्रेमवीरांच्या प्रेमाचं प्रतिक म्हणून समर्थपणे प्रत्येक कडव्यात वापरत ,
प्रत्येक कडव्यात त्याला नवा अर्थ , नवी उंची देऊन
शेवट तर अगदी हृदयस्पर्शी केला आहे.

============================================================

कळले आता घराघरातुन;
नागमोडीचा जिना कशाला,
एक लाडके नाव ठेऊनी;
हळूच जवळी ओढायाला.

जिना असावा अरूंद थोडा;
चढण असावी अंमळ अवघड,
कळूनही नच जिथे कळावी;
अंधारातील अधीर धडधड.

मूक असाव्या सर्व पाय-या;
कठडाही सोशिक असावा,
अंगलगीच्या आधारास्तव;
चुकून कोठे पाय फसावा.

वळणावरती बळजोरीची;
वसुली अपुली द्यावी घ्यावी,
मात्र छतातच सोय पाहूनी;
चुकचुकणारी पाल असावी.

जिना असावा असाच अंधा;
कधी न कळावी त्याला चोरी,
जिना असावा मित्र इमानी;
कधी न करावी चहाडखोरी.

मी तर म्हणतो - स्वर्गाच्याही;
सोपानाला वळण असावे,
पॄथ्वीवरल्या आठवणींनी
वळणावळणावरी हसावे...

कवी: वसंत बापट